Sa, Dua, Tiga, Empat, Lima, Enam, Tuu..juh!
O...Ha! O...Ha! O...Ha!
Nama utai ke temekung ninggang perabung
Munyi mangkung malu nubai?
Nama utai ke meletup munyi bedil
Nama utai ke tengauh munyi bandir?
Nama utai ke meletup munyi nitar
Nama utai ke tengauh munyi pinjar?
Sapa ke ngangau munyi mensia
Sapa ke nyapa munyi orang?
Lengan kiba enggi aku megai selinggau ijau manuk lia
Kena aku miau kita ke bekedunga duduk betentang
Laban kami sehatri tu bisi kereja nisi pengawa
Ngintu Hari Gawai Dayak.
O...Ha! O...Ha! O...Ha!
Enda aku busung raya lunggung,
nyebut pengua karung kerubung
Enda aku busung laya mantai,
angka aku bisi saru nyebut ibu bala kemang ke indai
Enda aku busung raya laya,
angka aku bisi tesebutka ibu bala kemang ke entua
Aku tu baka paku sulur gelung
Baka tubu sulur rebung
Baka kulat sulur tuchung
Baka wi tampung tali
Baka ijuk tampung penduk
Baka lemba tampung ira
Baka tenggang tampung belembang
Pechah periuk tanah ganti periuk Patani
Padam bulan ganti matahari
Parai orang ke tuai ganti tubuh kami.
O...Ha! O...Ha! O...Ha!
Aku ngangauka orang di Panggau Libau Lendat Dibiau Takang Isang
Orang di Panggau Lendat ke Betungkat Daun Sabang
Orang di Merawa Lama Munyi Berimba Bung Nebang
Orang di Engkeranji Padi Richah
Rami Nyampau Dikenang.
Ni dek Keling Gerasi Nading Bujang Berani Kempang
Datu Au Penyambut Punggu Berangan Ninggang
Kiai Anyai Sarat Sakai Pemanggai Lintang
Kiai Ria Penasau Nanga Temaga Gelang
Jelingau Betugau Mayuh Rambang?
Ni dek Sempurai Gundai datai ari Tatai Pala Penerang
Kedua bali nama Bungai Nuing Manuk Biring Sempidan Arang?
Ni dek Laja Lingga Tinggi bujang Merabung Kajang?
Ni dek Pungga Jelayan Muda Bebulu Ngena Ijau Lelayang?
Ni dek Pandak Segatak Manuk Jalak Menang Ditandang?
Ni dek Linsing kuning Berani Kering Enda Kala Nyelaingka Sumping Dengah Orang?
Aku ngagauka orang di Gelung Batu Nikung Nyingit Nyinggung Nyandar Nerabang
Orang di Runjai Panjai Kena Bintis Selanggai Kempat Tiang.
Ni dek Ngelai tuai orang di Meligai Besai Pungga Pungkang?
Ni dek Pau Tunggul Nugu Enda Alah Sepu Guyang Gumbang/
Ni dek Tutung Ulup Demung Bujang Lemandau Gendang?
Ni dek Gelayan Ragak Riang, Geluma Laki Manang?
O...Ha! O...Ha! O...Ha!
Oh, ni kita Petara Tugau entua Siung?
Ni kita Petara Melina 'Bungai Ringkai'?
Ni kita Petara Tuai Lemanak penama Empera?
Ni kita Petara Berauh Ngumbang laki Riti?
Ni kita Petara Ambau ari Rantau Tabau pengkalan Tawang?
Kitu aku kangau, aku tesau
Aku kumbai, aku lambai
aku padah, aku tunggah.
Ngambika bisi ngabang bisi masang
Bisi nandai bisi makai
Piring lebat piring sarat
Piring salai piring rendai
Piring asi piring tumpi.
Nya baru kita ninggalka kami ubat serangkap genap nadai ke timpang
Pengaruh gembar tubuh bisi magang.
Meri kami tanduk rusa ke beperiga mayauh bepempang
Meri kami taring uting babi belang
Batu asi batu ai
Ubat pandai ubat pengembai
batu kachang batu lempang.
Ngambika kami lantang kami senang
Ngebung baka langit, empusung baka bukit
Luar kami tu ila baka danau
Tampak kami tu ila baka pulau.
Awakka kami gayu-guru nguan menua
Lantang senang dikemataka Petara belama.
O...Ha! O...Ha! O...Ha!
Friday, 24 May 2013
Saturday, 16 February 2013
Nuan Semampai Kami Kenang.....
Ubak anak Sapong ( Apai Iba)
04.Ogos.1961 - 12.Februari.2013
(52 taun)
14.Februari.2013
15.Februari.2013
Subscribe to:
Comments (Atom)